Unha das actividades que máis non encheu de ledicia durante este curso, foi a colaboración coa profe do departamento de Historia Montse Vázquez. A súa proposta de involucrar ao alumnado de Historia do Mundo Contemporáneo de 1º de Bacharelato na creación de obras de banda deseñadaen galego que reflectiran momentos clave da Historia máis recente, pareceunos marabillosa. Así que organizamos obradoiros para formar ao alumnado e, posteriormente, Montse púxoos mans á obra. Este foi un proceso de meses de investigación, de revisión de guións... pero pagou a pena!!
Polo tanto, queremos mostrar algunhas destas estupendas obras. Preme no título e poderás lelas. Grazas, artistas!!
-Said. Análise da Primavera Árabe e realizados por Yamila Pena González e Paloma Paz Ayaso.
-11 M. Sobre os atentados perpetrados en Madrid no ano 2004. Creación de Sara Brión, Amador Ageitos, Paula Barros e Paula Pérez.
Hoxe reunímonos no CLUB DE LECTURA de 1º ESO para falar da obra de ANÉMONA DEL RÍO titulada A PROBA DE AUGA.
Trala publicación do primeiro manga en galego baixo o título deTam (Retranca Editora)Anémona de Río, que lograra o Premio Fin de Curso 2017 de O Garaxe Hermético, modélica escola profesional de banda deseñada e ilustración dirixida por Kiko da Silva, que tanto significa para a aprendizaxe e a normalización da banda deseñada galega, acadou con A proba de auga o I Premio de Banda Deseñada da devandita escola.
Situada no ronsel da súa primeira entrega, isto é, cun estilo a cabalo entre o manga e o cartoon, resulta inequívoco o seu interese tanto para normalizar este tipo de creacións entre nós, de crecente demanda nas xeracións máis novas, como pola actualidade da súa temática articulando, así, un percorrido imaxinativo polo interior do corpo humano cunha sección conclusiva de utilidade pedagóxica.
A proposta, así pois, asedia contidos científicos da man dun fío narrativo ben construído e marcado pola axilidade no manexo da trama onde non falta, nese percorrido amentado, a presenza dos temibles virus, das súas consecuencias e das vacinas. Talvez unha inmellorable ocasión para achegar estes conceptos a un público novo -e polo que parece non só- nestes tempos de pandemia.
Aproveitamos para falar de manga e anime, de autores galegos de banda deseñada e do GARAXE HERMÉTICO, a primeira escola de banda deseñada de Galicia.
-AKIRA. É unha manga escrito e debuxado por Katsuhiro Otomo entre os anos 1982 e 1990, obtendo un éxito significativo en Xapón e no resto do mundo. Premiada co Premio Kodansha ao mellor manga en 1984 na categoría xeral. É a base da película homónima de animación xaponesa e ambas as obras tiveron un recoñecemento instantáneo como clásicos dentro dos seus respectivos xéneros.
1988: O mundo está ao bordo da destrución absoluta. A tecnoloxía avanzada foi a causa dunha terrible explosión que desencadeou unha guerra nuclear e arrasou as grandes cidades do planeta. Trinta anos despois, sobre as ruínas de Tokio, álzase a megalópolis de Neo-Tokio, unha cidade opresiva e inhumana cargada de problemas como o desemprego, a violencia, a droga e o terrorismo. As loitas relixiosas e os grupos extremistas, aproveitándose da insatisfacción dos cidadáns, cultivan o mito de Akira, unha "neno cobaia" depositario da "enerxía absoluta" cuxa resurrección significaría para Xapón o amencer dunha nova era.
